胡孟青：资金轮流转站 水电燃气股宜炒

唔经唔觉开年就快一个月，旧年赢尽全球之泰国及印尼股市，却分别唔见咗 6.41%及 9.65%，睇嚟唔使半年就会输突。风水轮流转，年初至今廿几日，全球表现最标青股市三甲竟然系西班牙、希腊及意大利几只欧猪，分别录得 10.13%、 9.53%及 8.78%升幅，真系估佢唔到！散户入市惯性只睇自己一家牌，随时出铳都唔知咩事，打电话问股，净系问个冧巴而唔系上市公司本身嘅盈利前景。其实股票分析员都唔可以单一咁睇公司本身，既要睇宏观经济大气候，又要睇公司盘数，更加要关注管理层质素，其次至轮到股价走势中所揭示嘅大户手影。今日点解升？因为噚日跌得多囉！太多点解，点解唔关心吓资金点解要回流欧美？早知今日何必当初！

水电燃气股宜炒不宜揸

假如要睇较另类或复杂行业如石油股，基于其作为商品及具备期货概念，不得不看油价、金价及美元三者之互动力量，最近有大行话炒家沽黄金炒期油，唔知系咪反间计。若要炒中资油股，就更加要睇政府面色，天然气期货价由去年 11月初 3.62美元/百万英热单位楼下，反覆升至现时 4.55美元，累升逾 25%，地方物价部门准备上调水价、天然气价嘅决定都可以临时叫停，相关燃气股股价自然动弹不得。收紧之年，中央明显对通胀充满忧虑，因人民收入差距大，低收入者对通胀承受能力最弱。 CPI一向被视为穷人指数，社会财富分配结构影响人民所受压力， 1994年中国经历过 24%嘅恶性通胀，都未及现时严峻，主要由于当时 M1货币供应与 GDP比率为 0.43，现时却高近 0.6。M1狭义货币供应，即居民手上持有嘅货币，加埋银行活期存款，系最直接嘅真正流动性所在，同 CPI具高度关连性，与 M2同时支撑价格上涨趋势，酝酿多年的资源价格改革措施至今仍只闻楼梯响，看来未等到有关措施出台、资金未回转前，水、电、天然气相关股份只宜炒不宜揸。（胡孟青 作者为独立股评人）