胡孟青：此猪非彼猪 实力建业实力待测

内地供港活猪拍卖价过去一季涨了 20%，如此下去，唔使一年猪价就要累升一倍。但点升都唔及一幅 1998年以 34.5万元买返嚟， 12年后转手卖 1300万元赚 37倍嘅徐悲鸿大作《双猪图》，真系同猪唔同命，此猪不同彼猪，年复合回报率高达 32%，劲过地球上大部份大师级基金。卖家系平时成交水静鹅飞、股价长期向下炒嘅实力建业（ 519），果然唔打得都睇得（起码有幅画睇吓），公司嘅实力在哪里？去年底出售深圳平湖物业，售价 1750万元竟然蚀足 767万元，蚀卖当然入公司数，变成亏损，高揸低沽，似乎公司睇大陆楼嘅眼光比唔上睇画，有理由怀疑，上市公司系为咗粉饰财务报表而忍痛善价而沽。八八卦卦用咗些少时间睇过佢份年报，从来冇提及过上市公司有咁珍贵嘅珍藏，真系好想知道究竟佢手上仲有几多珍品，反正家游资泛滥，古董名画美酒价格水涨船高，老板咁有眼光，随时屋企或者办公室墙上都可以用手指笃中一幅劲嘢，炒家都有藉口对佢重新估值。市场挑通眼眉，未有为佢卖咗一幅画而吶喊，难得仲有三几只小猪唛落叠，祝佢哋出入平安啦！

秤实力建业测实力

集团全职员工得 16位，去年上半年才转亏为盈， 4766.6万元利润中，有 6445.2万元来自投资物业公平值增加净额，即系话实际仲系蚀紧，连经营现金流都系负数。睇埋集团其他资产都系超豪级数，例如计划喺 BVI（英属处女群岛）同巴拿马投资五星级度假村及游艇村项目，仲有高尔夫球场及豪宅，就知班老细几识叹世界。至于手上最贵重而能见度最高嘅物业，系全资拥有山顶施勋道 3号施勋别墅，估值超过 2亿元，刚好同公司市值相若。不过 BVI及巴拿马项目未正式上马，即系未有盈利贡献，资产估值却获计入，未来就算获批可按蓝图发展，然而钱从何来？上半年公司手头现金只有 240万元，随时连日常营运资金都好紧张。（胡孟青 作者为独立股评人）