胡孟青：人造稳定机制助新股扮劲

当那边厢郭氏三兄弟继续上演玄武门之变，另一大家族又嚟玩串烧三兄弟，以为祝福人家新婚三年抱两就好劲，自从见识过有两年抱三仲要系「慈菇椗」后，唔少人都改晒口，家睇嚟又要改为恭祝对方一炮三响。路过中环街头巷尾午饭前后左右食客皆议论纷纷，闹嘅人反而唔多，不过大家都普遍认为李公子应该快速替 3个小朋友搵番个妈妈，买蛋容易过买亲情，听讲曾经有常春藤大学女生靠卖蛋闲闲哋都可以搵到万几蚊美金一年，即系差不多成年嘅学费，不过过程就好残酷加辛苦。徐子淇虽然系生女，但系女唔好咩？家周围都系女人天下，起码仲要系天然自家精制，小朋友生长在充满亲情嘅完整家庭，幸福好多。

打工仔想做四叔员工

在人人讲钱嘅社会风气下，原来个个都想当恒基地产（ 012）旗下嘅员工，老板封利是闲闲哋成皮嘢，遇啱呢排股票唔听话，唔少股民嘅积蓄又锁死咗在新股未回笼，听讲有连另一家上市公司 TVB嘅职员都好想四叔快啲收购佢哋，咁就时时有利是喇！个市升埋升埋早已山雨欲来，今明两日有四环医药（ 460）加埋只 AIA（ 1299），后者在未正式挂牌前，市场已不断放风话暗盘升 1成，又话肯定会入甚么大鳄指数成份股，又讲到有几多张顶头槌大飞，搞到个场好旺求过于供，首日挂牌仲要玩埋十人应战十轮齐发，当然净系轮商追货都追到气咳啦，呢个睇嚟又系一个自我完成机制，与股价稳定机制配合得天衣无缝。怕就怕散户唔肯接货， AIA照正挂牌首半年应该相安无事，因为阿妈 AIG被反手綑绑，只系班大帝使唔使吹得咁大，真系咁劲就唔该讲暗盘升够 3成，好彩中东帮于上市前成功压价， AIA才保得住呢 1成。其实有好友仍然对佢有非份之想，话讲唔埋花旗国中期选举前，联储局会指使高佬出嚟身先士卒扫货，展示一下美资嘅战斗力。