胡孟青：边个仲敢睇淡？

“楼系要嚟住嘅！”好一句发人深省嘅本周至醒金句，我细细个就信o架喇，不过当你发觉自己可以透过一买一卖实现资本增值的话，楼嘅核心价值就实时改变。媒体发功渲染，发展商举牌抢货创天价，会俾人话剃政府眼眉，换转唔举牌又会俾旁观者话连手玩嘢；假如从善如流，更会俾人话与政府连手托市，正式系左右做人难，里外不是人。发展商可以唔睇政府台戏咩？总之听听话话，随时求仁得仁。

理得佢曾财爷系“9招12式”定系“3招14式”，通通都系花招兼虚招。要遏止楼市炒风，首先要追本溯源至问题核心，钱太多时息太低，当资金有如水银泻地，执起搵个地方安置都系烦恼。做实业难搵食，要存钱入银行又俾银行门口雷曼债券苦主挡住，索性将砖头掟嚟掟去仲化算。反正股神巴菲特都系钱搵钱，钱搵钱资本增值又唔系罪，与其透过经营实业储够一桶金才去入市买嚟住，更多人会选择直截了当将钱拿去炒买一番。

要赚钱总有地方，会德丰地产一日之内就袋咗1亿元，有钱人家化整为零转战车位，真系要谢天谢地，感谢香港政府打压楼市，否则大家边度有机会睇见资金实时灵活转身嘅好身手。有朋友炒二手楼炒到入上水粉岭，朝早买晏昼放，隔几日又要去签买卖合约，继续乐此不疲。炒楼已变成小众极有钱人玩意，香港贫富将更悬殊。以讹传讹以为内地人买晒香港所有嘅楼，内地客其实只占本地楼市成交约一成，绝对唔系坊间想象中咁多。

有人仲识惊，亦有人落咗车心思思上番车，故楼市距离爆煲仍然好远，系因为97年比将军澳蟹得更甚嘅深井楼价都未见家乡，当有朝连浪翠嘅楼蟹都得以松绑兼夹张牙舞爪，届时可能才是最坏的时候。具启示兼代表性嘅指标一个就够：长实（001）都睇好，边个仲敢睇淡？