胡孟青：君子爱财取之有道

李超人继续叫大家楼与股皆宜「量力而为」，现实中究竟又有几多人会真正识得睇餸食饭，近期身边唔少朋友，已被甚么天价大屋成交及甚么屋苑一两个月就赚几十万嘅报章财经版头条所刺激，蜂拥入市嘅买家来自四方八面，有计过度过宁愿炒楼好过做生意嘅老牌厂家，亦有未曾见过97年炒家点样一铺清袋嘅八十后，也有早咗落车又忍唔住上返车嘅用家。

百零万嘅盘已几近绝迹，除非去到屯门，200万楼因为厘印费只系100蚊、炒卖成本低而最受欢迎，前几日撞见住在楼下嘅邻居，原来佢已经卖咗间楼，暂时租住先，西贡独立屋三千几呎有埋私家泳池租5万零蚊，半山2000呎租金又系5万蚊，有无楼一身轻一族索性豪番次，拨出售楼之部份利润出嚟享受一下，反正买唔起咁大间屋，总之就系因为咁，市场租售俱旺。

过去几十年港人买楼已习惯做按揭，记得超人话过佢第一间楼系一次过畀晒，不过今时今日有几多个香港人可以买得咁豪呢？

家楼价跟薪金已完全脱节，一来地产商markup得犀利，二来打工仔出粮后使费大，又要供保险、又要畀家用，惨过俾人分身家，三来住宅楼实用率实在越来越低，实质呎价实在唔平。买楼当然唔好借到八、九成，但系要储够五、六成先至入市买楼，又要计到足随时加息或楼价向下加埋银行callloan等等或然风险才入市，咁个楼市又点可以有咁活跃呢！

最近有好多细铺唔见咗，时代广场加租，租户食肆又再洗牌，当大家眼见酒楼开始折埋，经济有几好真系呃唔到。君子爱财、取之有道，所指系合法之道与合情合理之道；然而君子亦不应立于危墙之下，假如你现时每个月供楼开支已接近入息一半，而在可见将来人工又未必会升得快过利息，咁就要三思三思。