胡孟青：华润创业斋啡还须加料

位于礼顿道与希慎道交界、利舞台对面翠园隔篱，以前有间星巴克，虽然论食物选择，对面 G.O.D.里面嘅 Habitu较多，论私隐度则应该系楼下嘅新宁餐厅。但几十蚊杯咖啡，卖嘅当然唔只水加咖啡粉，而系大都会情调。

其实上世纪 90年代中，星巴克已开展中国业务，仲喺大中华导演一出三国演义，将香港同广东代理权授予美心集团，台湾及江浙沪就授予台湾统一集团，北京、天津及华北区则授予风险投资基金创立嘅北京美大咖啡。可能香港铺租贵，论开店速度同经营绩效，由台湾统一集团跑出。

星巴克策略系只占海外投资 5%，减低风险兼每月收取专利金。喺内地，星巴克同统一集团旗下嘅统一超商及统一企业，由授权发展至合作， 03年增持股权至 50%，同年，星巴克喺日本因扩张过急令业绩见红，被迫煞停开店步伐。当一盘生意追求规模而忽略利润最大化，容易因失衡而自乱阵脚，开得太多就欠独特个性。

盘数好看不好食

华润创业（ 291）以 3.266亿元购入太平洋咖啡 80%权益，令 05年以 2.05亿元买入呢盘生意嘅其士泛亚（ 508）成功套现兼赚近一个开。

话就话以 12.1倍 EBITDA买返嚟，事实上仲要带佢入去竞争已经好激烈嘅内地市场，就算利用本身超过 2900间连锁超市网点嘅协同效应，都要预留多几个亿开支。冇华创引路，太平洋咖啡好难打低布局多年嘅星巴克，人家背后亦系大集团，加上麦当劳近年做埋 McCafe，制造价格竞争，对星巴克威胁唔细，所以家吓唔只卖咖啡，仲有自家品牌 Via嘅饮品，而太平洋咖啡的确较专注，杯咖啡冇咁甜，旧年跟本地财经媒体合作优惠网上订户买一送一，不过买 Coupon嘅支出由财经媒体出资，否则盘数点会咁好睇！睇怕呢盘生意到咗华创手上，好睇未必好饮，要畀心机慢慢凑，嫌杯啡斋斋哋，仲要落多啲 Cream。

胡孟青

独立股评人